2015 წელს დაიცვა სადოქტორო ნაშრომი თემაზე: „ქართველებისა და დასავლეთ ევროპელთა რელიგიურ-პოლიტიკური ურთიერთობა მე-11-13 საუკუნეებში“ და მიენიჭა ილიას სახელმწიფო უნივერსიტეტის ისტორიის დოქტორის აკადემიური ხარისხი. დავით თინიკაშვილი 2017 წლიდან არის ილიას სახელმწიფო უნივერსიტეტის აღმოსავლეთმცოდნეობის ინსტიტუტის ასოცირებული მკვლევარი. 2019 წლიდან კავკასიის უნივერსიტეტში ჯერ მიწვეული ლექტორის სტატუსით დაიწყო მუშაობა, ხოლო შემდეგ კი პროფესორის პოზიციაზე ისტორიის მიმართულებით. 2020-2021 წლებში იყო ოქსფორდის უნივერსიტეტის მკვლევარი. დავით თინიკაშვილის კვლევისა და სწავლების სფეროებია: ეკლესიის ისტორია, თეოლოგია, ქართულ-ევროპული ისტორიული ურთიერთობები, რელიგია და ათეიზმი, რელიგია და მეცნიერება, სიკვდილს მიახლოებული გამოცდილების (NDE) კვლევები. იგი არის 90-ზე მეტი ნაშრომის ავტორი, თანაავტორი და მთარგმნელი.
ბესარიონ ორბელიშვილი (გარდ. 1737 წწ; კათალიკოსობა: 1724-1737 წწ.) - გარეჯელი ბერი, ცნობილია, როგორც ავტორი გამორჩეული პოლემიკური ვრცელი ტრაქტატისა „გრდემლი“, რომელშიც მოცემულია რომის კათოლიკური ეკლესიის განსხვავებული დოქტრინალური იდეებისა და წეს-ჩვეულებების კრიტიკა. ქართული თეოლოგიური ლიტერატურის ისტორიაში ეს პირველი და უკანასკნელი ანტიკათოლიკური ქართულენოვანი ნაშრომია.
გრიგოლ ფერაძე დაიბადა 1899 წლის 13 სექტემბერს სიღნაღის მაზრის სოფელ ბაკურციხეში, მღვდლის ოჯახში. თბილისის სასულიერო სასწავლებლის დასრულების შემდეგ იგი თბილისის სასულიერო სემინარიაში აბარებს, რომელსაც 1918 წელს ასრულებს. სწორედ აღნიშნული სემინარიის რექტორის, პროფესორ კორნელი კეკელიძის შუამდგომლობით მიმართა საკათალიკოსოს საბჭომ გენერალ ფონ კრესს თხოვნით, რომ ახალგაზრდა გრიგოლი განათლების მისაღებად გერმანიაში გაეგზავნათ. მაგრამ გერმანიაში წარმოქმნილმა რევოლუციამ ეს განზრახვა სისრულეში ვერ მოიყვანა. ამის შემდგომ გრიგოლი საქართველოს სხვადასხვა რეგიონში მასწავლებლობს.